Stoaschlog !

Wars de Gams, is des de Schuidige ?

Ja klar, wer war denn sonst do schuid,

de springt doch immer rum do drom so wuid!

Schutzwald  Schutzwaldumfrage  Gams  Stoaschlog  Steinschlag

Na, Na, de Gams wars ned, des is im Bergwoid bloß a Gred.

----------------------------------------- 

Hoch drom steht sie im Gamsgebirg und is total frustriert,

ja foid eich denn nix bessas ei, daß i an ollem schuid soid sei?

 


Beim Stoaschlog denkt ma glei an Schutzwoid, der kon doch heyfn. Oder ?

A lang überfällige Umfrog über Sinn und Zweck von so an Schutzwoid.

Gfrogt hod koa Institut, sondern de Schnurstraxla.

Aber des moi net bei Umwelttheoretigern, sondern bei direkt Beteiligte und Betroffene bzw. direkt Troffene. 


 

Da Mensch im Doi

 

 Schutzwoid ? Supersach ! De Bam san Spitze, de hoidn uns de Stoa vom Hois ! Sonst miaßad ma im Doi net bloß auf d`Straß schaugn daß uns koana überfahrt, sondern a no daß uns koa Stoa überrennt.

Schutzwoid?

Der is echt guad !!

Da Bergsteiger

Schutzwoid? Oberhoib von dem Bam da war i vorbei ganga, da hätt mir der Schutzwoid nix bedeid. De wo weida untn gwesen san, de wern nix mitgriagt hom. De wissn gar nix von enam Glück - a so Pech für de.

Schutzwoid ?

Kimmt ganz drauf o, obst oberhoib oder unterhoib unerwegs bist !!

 

Da Bam

100 Johr steh i jetz do ! Ois hod passt: Super Aussicht, schene Sunnseitn - a guada Standplotz ! Ja und dann kimmt auf amoi der bläde Stoa daher. De Gams war genau zwischen Stoa und mir gwesn, des hätt den Aufprall a bissl dämpft. Aber was macht de Gams ? De hupft schnell weg und i kriag ois voi ab. Jetz bin i voi derpletzt. Bin den i der Depp vom Dienst ?

Schutzwoid ?

Saubläde Erfindung !!

Da Stoa

Tausende von Johr war i in da Felswand einzwickt. Jetz hätt i a Riesengaudi ghabt: Abikugeln übern Berg, zwischen de Bam durch, aufhupn, weida bis ins Doi und eini an Boch zum bodn. Aber leider hat mir de dumme Gams de Sicht versperrt und i bin dann voi an Bam hingrummpet. Jetz hab i ganz graß Kopfweh. Saubläd glaffn.

Schutzwoid ?

Scheiß Schutzwoid !!

Gams

De Gams

Schutzwoid hin oder her. Des war echt knapp. Da Stoa hätt so vui Zeit ghabt. Aber na - genau wenn i vorbei kimm muaß Er der Depp losspringa ! Hätt i ned grad zufällig naufgschaugt, dann war i jetz hi.

Schutzwoid ?

Do frogst du no ?

Der dreggs Stoa hätt mi boid Slebn kost !

Schutzwoid ? Überflüßig wia Kropf !!

Des Reh  (Befragung schwierig da extrem scheu)

Frong nur mit an riesen Abstand-sonst geht da nix!

s´Reh: Schutzwoid?

So a Stoaschlog is mir wurscht, wenns kracht und scheppert bin i rats fats weg.

Da fürcht i an Jaga scho mehra. Wenn i a greans Hemad sieg, hau i ab so schnell wias geht.

Obwoi??? . . . , wenn so a Stoaschlog an Jaga . . . 

hmm . . .

Des Reh denkt nach und geht langsam und ganz in Gedanken verlorn einfach weida 


Ja und iaz ?

Schutzwoid, guad oder schlecht ?

Kimmt ganz drauf o, wehnst frogst !


No a Frog ? Schnurstraxla ?

Da Schnurstraxla is a so Art Bergsteiger, nur daß a net in serpentinenform Richtung Gipfe geht.

Da Schnurstraxla suacht se a möglichst grode Linie zum Gipfe oder zumindest a grods Teilstück.

Auf gehts: Schnurstraxs wie a gspande Schnur zum Ziel.

In erster Linie is da Weg des Ziel.

Im besten Foi is des Gelände steil und unwegsam, bloß koa Weg und scho glei gor koa Forststraß !!

Bestimmt net Jedermanns Sach ! Muaß a ned sei !

 

Schnurstraxla  Bergstegga   Bergstock    Bergsteiger Schnurstrax

Das a se leichta duad, hod da Schnurstraxla an Gamshax entwickelt. A Stegga gleich dick von om bis unt. Braucha duad  ma natürle zwoa Stück davo. Beim aufwärz geh kon ma se am Gamshax regelrecht naufziang, na san de Arm a am Bergsteign mit beteiligt. Wia a Allrad kannt ma song. Den Gamshax losd ma beim obwerts geh einfach noch vorn durch Dhand rutschn und nahad bremst ma se am Stegga owe . Weil da Gamshax a ganz Rohr und koa Teleskop is, kon a ned zammgschom wern, des kunnt saubläd ausgeh. Am oban End is a digga Knopf sonst is a glei weg a. Weil a so lang is, kon ma houhe Dridd guad obfanga und zwar ohne das ma an Buggl macht wia a Hex. Führ de ganz steila Gschichtn hod da Gamshax an kuglglagadn Della, daß da Schbitz net ausghebed wern ko. Letzdendle is ma schneya und sichara undawegs und hod nodazua a Ganzkörpabewegung. Wieda Dahoam san dann a de Arm vom Bergsteign so schwar, das a hoibe Bier se Gwichtsmasse ofuid wia a Maß. Na dann Prost!

Gamshax

Gamshax: Koa TÜV , koa GS Zeichen - aber Schnurstraxlgprüft!

Beurteilung: Sauguad!

und nochoans: De Energie muaß a Jeder (m-w-d) selber midnehma, weil an Accu giebds beim Gamshax ned!


Gipfelkreuz

Da Gipfe, weida auffe geht zfuaß nix mehr !


Bei Plagiatsvorwürf bittschen bei de Schnurstraxla direkt beschwern!